اليوم و أخيراً تم تنفيذ القرار الصادر من قبلي
و هو الإنسحاب من جامعة الملك عبد العزيز بعد مرور عام و نصف
و طبعاً كالعاده لابد من وجود كل أنواع ( المرمطه ) الموجوده على سطح الأرض و سأروي لكم قصتي مع تنفيذ القرار
عفواً بس لازم أتكلم بالعامي عشان أعرف أعبر تمام
أولاً لي أسبوع تقريباً و أنا كل يوم أقول بكره الصباح لازم أروح الجامعه عشان أسحب ملفي و كل يوم أصحى الصباح
أقول : يوووووه مافي َ للمرمطه اليوم خليها بكره أحسن
و يجي بكره ولا أروح
بس اليوم دخل على غرفتي ( أبو دحكه جنان ) في الصباح الساعه ٨ تقريباً
قال : قومي خلاص سلمي أمرك لله وروحي دحين من بدري أحسن
و طبعاً سلمت أمري لله و رحت الجامعه و دخلت من بوابه شماليه إللي تعتبر أبعد بوابه عن عمادة القبول و التسجيل ،،،،،،،،، حتسألوني ليه دخلت منها ؟؟؟ و أقول لأني إنتساب و طالبات الإنتساب على راسهم ريشه ما يدخلوا إلا من بوابات معينه
المهم دخلت أدور على سيارة غولف عشان توصلني للعماده و ما لقيت فقلت مالي حل إلا إني أمشي على رجولي إلى العماده وفعلاً دخلت العماده وقلت بلاش ألفلف و أدور من فين أسحب ملفي فخليني أسأل من البدايه
المهم دخلت غرفه ١ أول غرفه لقيتها في وجهي
سألت إللي جالسه على المكتب >>>>> لو سمحتي من فين أسحب ملفي ؟؟؟؟
قالت : روحي عالصاله إللي في أول المبنى شباك رقم ١٣
قلت : طيب شكراً ،،،،، ورحت عالصاله إللي في أول المبنى شباك رقم ١٣
لقيت وحده جالسه في آخر المكتب و في عالم تاني و لا هي هنا ،،،،،،،، دقيت على الشباك ، ناديت ، يا أخت ، يا آنسه ، يا أستاذه (((((((( في الآخير حتعرفو ليش كانت في عالم تاني )))))))))
حتى ردت و قالت : نعم
قلت : لو سمحتي أبغا أسحب ملفي
قالت : روحي غرفه ٢٣ و هم من هناك يوجهوكي ((((أحلى توجيه))))
قلتلها شكراً و مشيت لغرفه ٢٣ آخر غرفه في المبنى ، و أول ما دخلت الغرفه أتوجهت على مكتب ( صباح ) أول مكتب
قلت : لو سمحتي أبغا أسحب ملفي
قالت : روحي لحنان آخر مكتب في الغرفه و خدي من عندها ورقة إخلاء طرف
و مشيت لآخر الغرفه لقيت مكتبين عليهم موظفتين و كلهم إسمهم حنان
قلت لوحده فيهم : لو سمحتي أبغا أسحب ملفي و أحتاج ورقة إخلاء طرف
قالت : و الله أنا عندي شغل عالكمبيوتر دحين روحي لحنان التانيه >>>>>>>> و لمحت إللي تسميه شغل لقيته منتدى الــ…….. ولا يمت لشغل الجامعه بصله أبداً
المهم طنشت ورحت لحنان التانيه
قلتلها : لو سمحتي أبغا أسحب ملفي و أحتاج ورقة إخلاء طرف
قالت : إنتي إنتساب و لا إنتظام ؟؟؟؟ (((فرحت و قلت في نفسي أخيراً حتخدمي الآنسه حنان التانيه ))))
قلت : إنتساب
قالت : روحي للمكتب الرابع عند الأخت ( عاليه ) (((((((( و يا فرحه ما تمت )))))))
رحت لمكتب ( عاليه ) و قلتلها : لو سمحتي أبغا أسحب ملفي و أحتاج ورقة إخلاء طرف ((((((( و الله كان نفسي أسجل الجمله دي في الجوال و أشغلها على كل مكتب )))))))
قالت : طيب خذي هذه الورقه و أكتبي البيانات المطلوبه و رجعيلي هي (((و أخيراً )))
كتبت المطلوب في الورقه ووقعت و أعطيتها الورقه
قالت : أعطيني بطاقتك الجامعيه
أعطيتها البطاقه و جلست تقريباً ٢٠ دقيقه تطالع في البطاقه و الورقه بالرغم إن المعلومات المطلوبه في الورقه ما هي إلا مجرد إسمي و رقمي الجامعي و التوقيع (((( يعني كلها كم كلمه تنقرء في دقيقه ))))
و بعد العشرين دقيقه أعطتني الورقه
و قالت : روحي لمبنى عماده خدمة المجتمع خلهم يختمولك هي و تتوقع و أرجعيلي
أخذت الورقه و جيت خارجه من الغرفه بدون ما أسأل عن رقم الغرفه في عمادة خدمة المجتمع و جلست أسأل نفسي (( يحتاج أرجعلها أسأال عن رقم الغرفه ؟؟؟ و لا ماراح أستفيد منها شي لأن الغرفه في النهايه حتطلع غلط؟؟؟؟ في النهايه قلت خليني أسألها أحسن يمكن دي يطلع منها شي عدل ))
رجعت و سألتها : لو سمحتي غرفه رقم كم أروح هناك ؟؟؟؟
قالت : ما أدري روحي هناك في الدور التاني و أسألي ((( بصراحه على قد إني ما أستفدت منها شي لكني أحترمتها بزياده لما قالتلي الصراحه )))
و خرجت من عمادة القبول و التسجيل و دعست بنزين (( على رجولي طبعاً )) على عماده خدمة المجتمع و دخلت العماده و طلعت الدور التاني >>>> دخلت على مكتب العميده لأنو كان أول مكتب
قلتلها : السلام عليكم ، لو سمحتي من فين أختم ورقة إخلاء الطرف ؟؟
قالت : روحي غرفه ٣١٨
رحت غرفه ٣١٨ ووقفت عند أول مكتب لقيتها جالسه تكلم بالجوال ((( تشرح للشغاله كيف تطبخ الأكل و الولد الصغير إللي في يدها )))
طنشتها ورحت للمكتب إللي بعدها >>> أعطيتها الورقه
و قلت : لو سمحتي أبغا ختم لورقة إخلاء الطرف إللي معايا
أخذت الورقه و ختمتها بسرعه فائقه (((بدون ما تطالع في الورقه من الأساس ))) و بدون ما توقع ورجعتلي الورقه
و قالت : خلاص روحي للمكتب إللي بعدي
قلت : طيب شكراً (((و أنا نفسي أرفسها أطيرها بره الجامعه )))
هذا كله و إللي في المكتب إللي جنبها بتطالع فينا أنا وهي بس ما أنتبهت إن الورقه أتختمت خلاص ((( من السرعه إللي أتختمت فيها الورقه )))
رحت للمكتب إللي بعدها و أعطيتها الورقه
قلتلها : ممكن بس توقعيلي على ورقة إخلاء الطرف دي
قالت : حااااااضر يا قلبي من عيوني
مسكت الورقه و جلست تطالع فيها و بعدين أعطتني نظره حلوه و أبتسمت و كلمت إللي جنبها
قالتلها : إنتي ختمتيلها الورقه
قالت : إيوا ليه ؟؟؟
قالتلها : طيب ليش ما وقعتي عليها ؟؟؟!!!!!!!!
قالت : مافي أوقع ، خلاص إنتي وقعيلها ، إيش المشكله يعني ؟؟ لازم أنا أوقع
و بعد اللف و الدوران أخيراً أتختمت الورقه و أتوقعت بسلام و بدون مضاربات
طبعاً دحين لازم أرجع لعمادة القبول و التسجيل عشان أستلم ملفي >>>>> ودعست بنزين عليها ودخلت غرفه ٢٣ عند مكتب عاليه
و المفاجأه (( عاليه مكتبها فاضي ))
لفيت بعيني في الغرفه لقيتها جالسه ( تطق حنك ) مع حنان الأولى
و أول ما شافتني جاتني و أخذت الورقه مني ووقعت عليها
و قالتلي : خلاص روحي أستلمي ملفك من غرفه ١٣ بس أدخلي من الباب مو من الشباك ((( حسيت نفسي كنت بأخطف ملفي )))
فاكرينها إللي كانت في عالم تاني و لا هي هنا
رحت عندها و أول ما دخلت سمعت صوت طلال مداح بيغني أغنية ( من بعد مزح و لعب )
في البدايه شكيت في نفسي قلت يمكن مخي ضرب مع الشمس وبدأت أسمع أشياء من عقلي الباطني
و أضرب بعيني ألاقي الأخت مشغله الأغنيه في ( الويندوز ) حقها و فاتحه موقع طرب و جالسه تنزل أغاني
صراحه وقتها أصابني الضحك و نسيت كل ( المرمطه ) مو عشانها بس عشان المسكين إللي بيغني عندها
المهم أعطيتها الورقه و البطاقه الجامعيه و أخذتهم ودخلت غرفه تانيه
و أنا بأنتظر سألتني وحده كانت جالسه تنتظر معايا في نفس الغرفه
قالت : إنتي جايه تستلمي وثيقة التخرج
ضحكت و قلتلها : تقريباً
قالت : كيف يعني ؟؟؟
قلت : أنا جايه أخرج مو أتخرج
قالت : أكيد دا أعظم قرار أتخذتيه في حياتك
قلت : أكيييييد ، أصلاً إللي يتخرج من دي الجامعه المفروض يعطوه شهاده خبره في جميع أنواع المرمطه و حرق الأعصاب
قالت : و الله إنك صادقه
حبيبتي إنتي متزوجه : قاطعتنا إمرأة طلال مداح
قلتلها : أنا
قالت : إيوا
قلتلها : لأ
قالت :طيب ليش بتسحبي من الجامعه؟؟؟؟ مو حرام ما تكملي دراستك
قلتلها : مو أنا ساحبه ملفي عشان أكمل دراستي
طبعاً كده أنا أفحمتها فأضطرت إنها تسكت و تعطيني ملفي و هي ساكته
و كده أنتهت معاناتي مع الجامعه إلى الأبد
بالله مو أعظم قرار أتخذته ؟؟؟؟